“Jam njeriu me IQ-në (koeficientin e inteligjencës) më të lartë në botë, YoungHoon Kim, dhe e them këtë jo vetëm me logjikën njerëzore, por edhe me një zbulesë hyjnore. Jezu Krishti do të kthehet gjatë brezit tonë. Kjo është një e vërtetë që m’u zbulua nga Zoti, Ati dhe Shpirti i Shenjtë”. Kështu nis njoftimi i njeriut më të mençur në botë, përmes një videoje të shpërndarë në rrjetet sociale.
Koreano-jugori, me një koeficient inteligjence të konfirmuar prej 276 pikësh, ka pohuar se Jezu Krishti do të kthehet në kohën tonë: “Unë e kam marrë hirin jo vetëm përmes besimit, por edhe përmes dhuratës së IQ-së më të lartë në botë. Inteligjenca ime nuk është për mua. Ajo është një shenjë e Zotit, një dhuratë për të dëshmuar të vërtetën e Tij. Dhe është prova që jam i caktuar për të parë atë që të tjerët e shpërfillin dhe për të folur për atë që të tjerët e kanë frikë”.
YoungHoon Kim shpjegon se, përveçse e ka marrë këtë mesazh nga Zoti, ai është gjithashtu i vërtetuar nëpërmjet fizikës kuantike dhe parimit të relativitetit të Ajnshtajnit: “Shkenca moderne tregon se koha nuk është e mbyllur.
Ajnshtajni tregoi se koha lëviz në mënyrë të ndryshme, në varësi të shpejtësisë dhe gravitetit. Kështu që kur Jezusi tha: ‘Ky brez nuk do të vdesë derisa të ndodhin të gjitha këto gjëra’, Ai po fliste nga përjetësia, jo sipas orëve njerëzore. Dhe fizika kuantike mëson se ajo që besojmë dhe vëzhgojmë mund të formësojë atë që bëhet realitet”.
“Kur shumë njerëz fillojnë të shohin të vërtetën, profecia bëhet e tashmja. Dhe pikërisht kjo po ndodh tani. (…) Ne krijuam inteligjencën artificiale që mendon, por harruam si të mendojmë vetë. Ndryshojmë ADN-në tonë, por mohojmë se kush jemi vërtet. Dhe vrasim të pafundmen dhe e quajmë liri. Ngatërrojmë të vërtetën me opinionin dhe adhurojmë përparimin në vend të Zotit. Ky nuk është evolucion apo përparim, por katastrofë”, ka thënë ai.
Ai ka dhënë një paralajmërim, duke kujtuar fjalët e Jezu Krishtit: “Dhe pikërisht këtë paralajmëroi Jezusi: gënjeshtra, mosbindje ndaj ligjit, tradhti dhe njerëz që nuk kujdesen më për njëri-tjetrin. Jezusi tha: ‘Kur të shihni që këto gjëra fillojnë të ndodhin, dijeni se jam afër'”.
YoungHoon Kim, i cili pohon se nuk është profet, ka theksuar rëndësinë e mesazhit të tij: “Zoti ma dha këtë dhe më dha gjithashtu IQ-në më të lartë në botë si provë të thirrjes së Tij. Jo për lavdinë time, por për të shpallur të vërtetën e Tij me zë të lartë dhe si dëshmitar i shkencës, historisë, shkrimit të shenjtë dhe, mbi të gjitha, i Shpirtit. (…) Kjo nuk është fe, kjo është e vërteta përfundimtare. Prandaj duhet të pendohemi, të përgatitemi, jo për traditë, por për rikthimin e Mbretit të Mbretërve”.
