Imazhin e Efrosina Arapit e mbaj mend që fëmijë, në televizionet lokale të Vlorës. Një figurë që të binte në sy jo vetëm për mënyrën e pastër dhe të artikuluar të të folurit, por mbi të gjitha për seriozitetin, profesionalizmin dhe dashurinë që përcillte për qytetin e saj.
Për më shumë se 30 vite në gazetari, Efrosina Arapi ka qenë spikere lajmesh, gazetare terreni dhe kronikane. Kudo ku ka pasur një ngjarje, një histori, një problem apo një lajm që duhej treguar, ajo ka qenë aty.
Por përtej profesionit, ajo ka qenë gjithmonë edhe qytetare e Vlorës. Një gazetare që nuk e ka parë qytetin vetëm përmes kamerës, por e ka përjetuar, e ka njohur dhe e ka dashur atë.
Në ekranet e televizioneve lokale, zëri i saj është bërë pjesë e një epoke të medias vlonjate. Për shumë prej nesh, sidomos për ata që jemi rritur duke parë televizionet lokale, Efrosina është një nga ato figura që nuk harrohen lehtë.
Sepse disa njerëz nuk mbeten thjesht në arkivat e televizionit.
Mbeten në kujtesën e qytetit.
Dhe Efrosina Arapi është një prej tyre.
Një grua e medias, një gazetare e terrenit, një zë i njohur dhe mbi të gjitha, një vlonjate që i ka kushtuar më shumë se tri dekada jetës së saj profesionit dhe qytetit që do. ❤️🌊/ E dua Vloren
